Pajaratan Cinta
Karya DHIPA GALUH PURBA
Adegan I
Wanci
beurang di palataran nu éndah. Di lebah dinya aya lobang nu mirip
lobang kuburan. Arin jeung Jaka anjog. Arin jeung Jaka saumur, kira
25-30 taunan. Barang srog anjog, aya hiji wanoja tengah tuwuh nu
nyurungkunung ti jero lobang bari nyikikik seuri, sarta ninggalkeun éta
patempatan. Arin ngagoak, ngagabrug Jaka.
JAKA
Teu kudu sieun, Arin. Lantaran urang ogé bakal ngagebrus ka jero lobang…
ARIN
Naha urang bet kudu kikieuanan sagala, Jaka? Naha taya jalan séjén keur nuntaskeunana?
JAKA
Aya.
Malah sakapeung mah kuring sok mikir, dimana salahna atuh urang silih
pikacinta? Kapan cinta téh anugrah ti Gusti nu kudu dipupusti. Datangna
cinta tara pipilih mangsa, tara ngawilah-wilah kaayaan..
ARIN
Tapi dina kaayaan siga ayeuna, cinta urang téh salah kabina-bina.
JAKA
Cinta
mah teu salah, Arin. Di lebah mana salahna cinta? Nu salah mah anjeun.
Naha anjeun kalah kawin ka batur? Ari anjeun téh micinta salaki anjeun?
ARIN
Jaka,
10 taun urang paturay. Anjeun leungit laratan, teu kungsi némbongan.
Anjeun kudu nyaho, salila éta, kuring téh sabenerna nganti-nganti
kadatangan anjeun… Tapi asa teu penting ngamasalahkeun perkara nu geus
kaliwat. Ayeuna mah: urang rék kumaha ka hareupna?
JAKA
Kumaha anjeun baé. Naha rék siga Rahwana nu nyulik Shinta, atawa siga Prabu Geusan Ulun ngarebut Praméswari Harisbaya.
ARIN
Rahwana teu bisa meruhkeun Shinta…Cinta Shinta tetep ukur keur Rama. Lalakon kuring teu siga Shinta…
JAKA
Tapi Geusan Ulun mah bisa nyandingkeun Harisbaya…
ARIN
Bener,
ngan… naha anjeun geus itung-itungan nyanghareupan perang campuhna?
Anjeun bakal palagan ngalawan salaki kuring, kulawargana, kulawarga
kuring, sarta anak kuring… naha anjeun siap ngayonanna, Jaka?
JAKA
Lain
siap atawa henteu siap. Pasualanna téga jeung henteu téga. Cinta mémang
butuh pangorbanan. Tapi… lain kudu ngorbankeun jalma-jalma nu teu tuah,
teu dosa. Jalma-jalma nu salila ieu kalintang micinta anjeun.
ARIN
Jadi….?
JAKA
Kuring anu kudu ngéléhan. Kuring nu kudu ngaleupaskeun anjeun… susuganan ku cara kieu anjeun bisa pinanggih jeung bagja…
ARIN
Jaka, naha bener cinta téh mimitina datang tina panon?
JAKA
Bener.
ARIN
Lamun kitu mah kuring moal ningali deui anjeun.
JAKA
Sok, pecakan peureum, ngarah kuring leungit tina paningali anjeun.
Arin peureum. Teu lila nginghak ceurik, nepi ka merebey cipanon.
ARIN
Geuning kalah leuwih jelas ningali anjeun, Jaka….
JAKA
Geus,
Arin, teu kudu ceurik. Matak kuring ngajak kadieu ogé, kuring rék nyiar
tarékah. Susuganan ieu pisan jalan anu panghadéna pikeun urang.
ARIN
Jalan panghadéna? Kumaha maksud anjeun téh, Jaka?
JAKA
Ieu lobang téh ngaranna Pajaratan Cinta. Can pati loba nu nyarahoeun ka ieu patempatan.
ARIN
Pajaratan Cinta?
JAKA
Enya,
Pajaratan Cinta, tempat ngurebkeun cinta. Ceuk dongéngna mah, anu
nyieun Pajaratan Cinta téh ngaranna Pohaci Rababu, nu hirup dina jaman
karajaan Galuh.
ARIN
Naon alesanna Pohaci Rababu bet nyieun Pajaratan Cinta?
JAKA
Lantaran…
sanggeusna Rababu kawin ka Sempakwaja, manéhna kungsi salingkuh jeung
Mandiminyak. Rababu kaduhung. Rababu sadar kana kasalahanana. Anu
antukna Rababu nyieun lobang di dieu, pikeun ngurebkeun cintana ka
Mandiminyak sigana mah…
ARIN
Jadi, lamun urang asup ka Pajaratan Cinta, hartina cinta urang bakal musna?
JAKA
Urang cobaan wé. Sabab, béjana mah sing saha nu hayang ngurebkeun cinta, tinggal asup kana lobang Pajaratan Cinta….
Arin jeung Jaka asup ka jero lobang. Saméméh laput, Arin ngahuleng, tuluy neuteup Jaka. Sakedapan silih teuteup.
ARIN
Jaka, basa Pohaci Rababu salingkuh jeung Mandiminyak… naha aya sambungan caritana?
JAKA
Naon maksud anjeun? Sambungan carita siga kumaha maksudna?
ARIN
Maksud téh…. Nepi ka kumaha salingkuhna Rababu?
JAKA
Oh….
Kadinya maksud anjeun téh. Lamun anjeun hayang nyaho, balukarna
salingkuh jeung Mandiminyak, Rababu nepi ka ngandeg. Saterusna boga
budak nu dingaranan Bratasena. Lalakonna panjang kénéh. Brataséna boga
turunan nu dingaranan Sanjaya.
ARIN
Sanjaya?
Mun teu salah, anjeun kungsi nyaritakeun kumaha hébatna tokoh nu ngaran
Sanjaya dina jaman karajaan Galuh. Anjeun kalintang mikagum tokoh
Sanjaya. Malah… anjeun kungsi nyarita, lamun hiji mangsa diparengkeun
boga budak lalaki, bakal dingaranan Sanjaya.
JAKA
Enya, bener. Lamun kuring boga budak ti anjeun, bakal dingaranan Sanjaya.
ARIN
Jaka, apan Mandiminyak ogé henteu kawin ka Pohaci Rababu, tapi geuning manéhna bisa boga turunan ti Pohaci Rababu.
JAKA
Kuring
lain Mandiminyak, Arin! Jeung sabenerna, Mandiminyak mah henteu micinta
Rababu. Mandiminyak ukur ngalajur napsu. Cinta kuring ka anjeun, henteu
siga Mandiminyak ka Rababu. Kuring mikanyaah anjeun, mikadeudeuh
anjeun, teu boga niat ngageugeuleuh diri anjeun.
ARIN
Jaka….
JAKA
Arin, hayu urang kurebkeun cinta urang…
Jaka jeung Arin asup ka jero lobang nepi ka laput. Lampu pareum.
Adegan II
Wanci
peuting. Arin hanjat ti jero lobang bari ngahinghing ceurik. Tuluy
ninggalkeun éta patempatan. Teu lila, Jaka ogé hanjat ti jero lobang.
JAKA
Arin…! Ariiin…! Ariiin…!
Jaka ngulibek néangan Arin tug nepi ka ngalempréh.
JAKA
Ariin… (ngahariring sempalan lagu “Sempurna”)….janganlah kau tinggalkan diriku, tak kan mampu menghadapi semua, hanya bersamamu ku akan bisa…
Kadéngé aya sora anjing babaung.
JAKA
Gandéng lah, anjing, teu kudu babaung sagala. Nu dikurebkeun mah ukur cintana, lain jalmana…
Anjing ngagogog harus pisan. Jaka ngaranjug, awahing ku reuwas, langsung luncat ngagebruskeun manéh ka jero lobang.
JAKA
(di
jero lobang, nuluykeun haharingan lagu “Sempurna”) kau adalah darahku,
kau adalah jantungku, kau adalah hidupku, lengkapi diriku, oh sayang
engkau begitu sempurna….
Ronghéap, datang Arin nu salin jinis jadi Pohaci Rababu
RABABU
Angin
tingtrim nu ngadalingding nyanding kasimpé peuting, pangnyingraykeun
aling-aling nu mindingan éling. Purnama nu murubmubyar mancerkeun cahya
gilang gumilang, panggeuingkeun hiji jajaka asmana Jaka…
Jaka hanjat ti jero lobang. Tuluy mencrong Rababu dibarung rasa kahémeng.
JAKA
Arin?!
RABABU
Caang
bulan narawangan, teuteup anjeun masih kénéh taya lilinggeran. Anjeun
tetep nuturkeun geterna rasa, ngayunkeun rupaning haréwos dada. Antukna
beureum hideungna carita kahirupan nu saméméhna anggang tina sawangan,
kiwari pagaliwota meulitan raga. Gumulung raga disurakan sétan,
haroshosna sora, kebek kadurjanaan. Geus peupeus eunteung pamuka rasa
anjeun. Geura gebraykeun paneuteup anjeun, buka mata jiwa, beunta mata
soca. Purnama ukur éndah disawang ti kaanggangan. Sakapeung cinta
ngalolongkeun mata jiwa jeung mata panon. Sakur nu kasawang ukur
manéhna. Ningali béntang siga Arin. Ningali langit siga Arin. Ningali
kula ogé siga Arin…
JAKA
Lamun anjeun lain Arin, saha atuh anjeun téh?
RABABU
Najan
taya kecap nu kedal, najan taya rindat nu natrat, kasatiaan bakal
karampa na pungkas carita. Teuing geus sabaraha kali anjeun ngajejeléh
kula, majar kula kungsi rucah jeung Si Mandiminyak.
JAKA
Pohaci Rababu? Anjeun téh Nyai Rababu téa? Ah, piraku teuing? Ngimpi meureun ieu mah…
RABABU
Antara impian jeung kanyataan ukur diwatesan ku lalangsé éling. Angin leutik ngadalingding, ngaguar mangsa lungkawing, mawa nyérédét kana rasa nu rungsing.
JAKA
Naon maksud anjeun nepungan kuring, Nyai Rababu?
RABABU
Anjeun
nunggeulis dina gerotna kahirupan. Padahal unggal léngkah, léngkah
anjeun. Unggal rénghap, unggal kecap, saéstuna ukur kahayang anjeun
sorangan. Anjeun teu nyaho pangbalikan. Anjeun kasarung. Anjeun
kalarung. Taya gunana anjeun humarurung ngumbar kabingung. Sakalina
anjeun ngurebkeun cinta di Pajaratan Cinta, mangka saéstuna anjeun
ngurebkeun sagala rupana. Asih pasini baris lugay na kembang samoja,
taneuh beureum papaés nu hamo sirna…
JAKA
Kuring
teu ngarti kana caritaan anjeun, Nyai Rababu. Tapi geus jadi tékad
kuring, moal incah balilahan ti Pajaratan Cinta saméméh cinta kuring ka
Arin bener-bener sirna…
RABABU
Asih
munggaran dina carita katresna, muga henteu dipungkas ku keclakna
cimata. Katresna anjeun, katresna Arin datangna deui dina mangsa nu
salah. Geus leuir kacida. Mending geura sorang ku anjeun carita anu
baris datang. Anjeun bakal nyorang bagja dina ranggeuman réma-réma anjeun.
Anjeun bakal manggih bungah dina seuseup deudeuh. Tuh, teuteup ka
hareup ku anjeun… sapanjang léngkah pikahareupeun, pinuh jukut ngémploh
héjo, ngembat lir alketip buludru, nu bakal nilaman suku tina cucuk
ruhit. Anjeun bakal nyaksi katumbiri anu melengkung di langit cangra, nu
mayungan katresna, nu ngaraketkeun duriat, beureum, héjo, konéng,
gandola, murub mubyar nyawér tali asih…
JAKA
Kuring
moal manggih kabagjaan lamun teu ngahiji jeung Arin. Sakali Arin,
salawasna bakal tetep Arin. Cinta kuring ukur keur Arin. Anjeun ulah
myapirakeun cinta munggaran. Cinta nu dianyam ti jaman keur nyuprih
pangarti di sakolaan, mibanda kakuatan nu rohaka.
RABABU
Cinta nurutkeun anjeun ukur manjang lana sapanjang tacan datang cinta nu hiji deui. Tangkeup geugeut anjeun saukur mawa ngapung ngawang-ngawang, nobros
hahalang dunya nu mémang kacirina caang baranang. Hanjakal, béntang nu
tinggurilap, bulan anu narawangan alam, ukur mawa nyimpang ka sawarga
dunya, nu bakal méré siksa dina poé panungtungan…
JAKA
Basa
keur sakola, kuring sabangku jeung Arin. Ka mamana babarengan, tug nepi
ka kedal jangji pikeun ngahiji. Sakali deui, ulah nyapirakeun hiji
cinta jaman sakola…
RABABU
(bari malikeun awakna, rék ninggalkeun Jaka)
Kuriling uring-uringan, nokér jalan rumpil kahirupan, tanwadé wates
singkur kabunian. Gudawang raheut nu kasorang, hamo kaubaran. Galengan
leutik nyiripit, ngapit jarami tangtungan dina usum paceklik, mawa
kapeurih dina haté anu ruhit. Kula amit…
Pohaci Rababu ngaléngkah ninggalkeun éta patempatan, tapi ngarandeg lantaran Jaka ngageroan.
JAKA
Nyai Rababu…ari anjeun bogoh ka Mandiminyak?
RABABU
Ukur
sakédét nétra lalakon anu karandapan, ninggalkeun gurat-gurat kapeurih
nu taya papadana. Papadon los kakolong, gingsir tina panaksir, sulaya
tina panyangka, horéng asihna ngan pupulasan. Pegat kamelang, asih geus
pungkas. Saéstuna kula kawisaya ku Si Mandiminyak. Sakali deui, kula
kawisaya. Kilang kitu, kacinta kula ka Brataséna taya hinggana.
Brataséna anak kula, nu teu tuah, teu dosa.
Rababu ninggalkeun éta patempatan. Jaka ngahuleng hareupeun lobang.
O.S. SANGKURIANG
Sumbi….! Sumbiii…!
Sangkuriang ngaronghéap datang.
SANGKURIANG
Kisanak, ari andika ningali awéwé geulis ngaliwat kadieu?
JAKA
Ningali, malah bieu ngawangkong didieu.
SANGKURIANG
Ayeuna kamana?
JAKA
Indit ka beulah ditu.
Sangkuriang lumpat ka lebah nu dituduhkeun ku Jaka. Teu lila, Sangkuriang balik deui.
SANGKURIANG
Euweuh geuning, Kisanak. Aéh, ari bieu ngawangkong naon baé? Naha manéhna ngobrolkeun kuring?
JAKA
Mémangna saha ngaran anjeun téh?
SANGKURIANG
Piraku
andika teu wawuh ka kuring. Apan kuring téh sinatria nu geus kaceluk ka
kadang éwu, kakoncara ka janapria. Ngaran kuring Sangkuriang téa…
JAKA
Sangkuriang?
SANGKURIANG
Teu salah, kuring pisan Sangkuriang. Pasti awéwé geulis nu bieu ngomongkeun kuring nya?
JAKA
Asa henteu nyaritakeun ngaran anjeun.
SANGKURIANG
Ngomongkeun saha atuh?
JAKA
Ukur nyebut ngaran Mandiminyak jeung Brataséna …
SANGKURIANG
Piraku
teuing teu nyebut ngaran kuring, Kisanak? Asa kakara ngadéngé ngaran
mandiminyak atawa Brataséna. Jawara ti mana maranéhna téh? Boa-boa nu
bogoheun ka Dayangsumbi.
JAKA
Dayangsumbi? Asa beuki jangar kieu.
SANGKURIANG
Andika teu kudu jangar sagala. Ayeuna mah kari jawab, saha ngaran awéwé nu bieu ngawangong jeung andika?
JAKA
Pohaci Rababu…
SANGKURIANG
Pohaci
Rababu? Hartina andika ngabohong ka kuring. Ceuk andika, bieu andika
ngawangkong jeung awéwé geulis… tapi geuning ngaranna Pohaci Rababu.
JAKA
Lebah mana kuring bohongna? Mémang Pohaci Rababu téh kalintang camperenik geulis…
SANGKURIANG
Ah, rahul pisan andika mah. Di ieu dunya, euweuh deui awéwé nu geulis kawanti-wanti, kajaba Dayangsumbi.
JAKA
Béda panon, béda cara ningali…
SANGKURIANG
Ceuk sasaha ogé Dayangsumbi panggeulisna mah. Awas mun andika nyebut Rababu leuwih geulis ti Dayangsumbi…
JAKA
Enya, Dayangsumbi mémang geulis kawanti-wanti. Tapi moal bisa nandingan kageulisan Arin…
SANGKURIANG
Arin?
Asa ahéng pisan ngaran téh. Sapanjang kuring kumelendang di alam dunya,
tacan kungsi manggihan jalma nu ngaranna Arin, boh awéwé, komo lalaki….
JAKA
Lamun anjeun geus panggi jeung jinisna, pasti anjeun bakal percaya…
SANGKURIANG
Pamohalan, Kisanak! Moal aya awéwé nu nandingan kageulisan Dayangsumbi…
Ronghéap Arin, nu salin jinis jadi Dayangsumbi.
SANGKURIANG
Tah geuning, anu ditéangan téh teu burung némbongan…
JAKA
Arin….?!
Jaka rék ngadeukeutan Dayangsumbi, tapi ngarandeg lantaran disentak ku Sangkuriang.
SANGKURIANG
Héy… andika ulah kumawani ngadeukeutan Dayangsumbi. Ulah sambat kaniaya lamun andika paantel kulit jeung Dayangsumbi….
DAYANGSUMBI
Sangkuriang,
hidep téh anak kuring. Sing percaya ka kuring. Kuring mah indung hidep.
Naon kasebutna lamun anak jatukrami ka indungna sorangan? Geura éling,
Sangkuriang…
SANGKURIANG
Teu
kudu réa alesan, Sumbi. Kuring téh cinta ka anjeun. Tuh, aya bulan dina
panon anjeun. Kasatiaan kuring bakal leuwih ti bulan. Kasatiaan kuring
bakal leuwih tina panon anjeun. Bulan tara némbongan unggal peuting, ari
kuring mah bakal maturan anjeun saban peutin. Panon anjeun tara beunta
beurang-peuting. Ari kuring mah bakal ngajaga anjeun salawasna….
JAKA
Jadi… anjeun téh Dayangsumbi?
DAYANGSUMBI
Bener
pisan, Kisanak. Ngahaja kuring ngajugjug kadieu, hayang ngurebkeun rasa
cinta kuring jeung cinta Sangkuriang. Lantaran, apan anjeun apal
sorangan, Sangkuriang téh anak kuring.
SANGKURIANG
Sakali deui, kuring teu percaya lamun anjeun indung kuring…
DAYANGSUMBI
Kuring indung hidep, sing percaya anaking… tuh aya ciri nu sayakti dina mastaka hidep.
JAKA
Mémang
hésé ngabuktikeunana ari saukur ningali ciri dina sirah mah. Lamun
hayang leuwih yakin jeung akurat, mending kénéh tés DNA.
SANGKURIANG
Andika ulah kalah ngacapruk. Hayu, Sumbi… kuring téh deudeuh pisan ka anjeun.
DAYANGSUMBI
Teu beunang dibéjaan geuning hidep téh. Lamun kitu carana, hayu urang asup ka jero lobang…
SANGKURANG
Ulah, Sumbi! Ieu téh apan Pajaratan Cinta! Lamun anjeun asup ka dinya, hartina anjeun rék ngubur rasa cinta…
DAYANGSUMBI
Enya, mémang cinta urang kudu dikurebkeun didieu.
Dayangsumbi ngagajleng ka jero lobang.
SANGKURIANG
Sumbi, ulah kikituan! Hayu buru-buru hanjat deui!
DAYANGSUMBI
Hidep nu kudu asup ka dieu, Sangkuriang… ngarah hidep henteu micinta indung sorangan.
SANGKURIANG
Moal!
Anjeun mah da lain indung kuring. Anjeun kudu jadi pamajikan kuring.
Buru hanjat deui, Sumbi! Kisanak, bantuan panghanjatkeun Dayangsumbi…
JAKA
Percumah, Sangkuriang. Sing saha anu ngasruk ka Pajaratan Cinta, hartina…
SANGKURIANG
(bari nyurungkeun awak Jaka, nepi ka Jaka tigebrus kana lobang) Lain percumah-percumah, bantuan panghajatkeun Dayangsumbi!
Ti jero lobang, Jaka munggu Dayangsumbi. Sangkuriang ngarawél leungeun Dayangsumbi nepi ka hanjat ti jero lobang. Jaka hanjat sorangan.
DAYANGSUMBI
Sangkuriang, hidep kudu asup ka jero lobang.
SANGKURIANG
Moal. Di ieu dunya, kuring mah taya nu dipikasieun. Ukur hiji nu dipikasieun ku kuring, nyaéta sieun kaleungitan anjeun, Sumbi.
Sakilat
Dayangsumbi rék nyérédkeun awak Sangkuriang sangkan tigebrus kana
lobang. Tapi Sangkuriang ngagiwar, anu antukna kalah Jaka nu
kasurungkeun. Jaka tigebrus deui ka jero lobang.
DAYANGSUMBI
Lamun anjeun keukeuh maksa… teu bisa kumaha deui.
SANGKURIANG
Anjeun daék jadi pamajikan kuring?
DAYANGSUMBI
(unggeuk) Tapi aya tanjakanna…
SANGKURIANG
Naon baé saratna, tangtu ku kuring bakal diayonan. Sok, geura sebutkeun naon saratna, Sumbi.
DAYANGSUMBI
Engké baé bakal dibéjakeun di imah. Hayu ayeuna mah urang mulang…
SANGKURIANG
(Rék ngaléng Dayangsumbi) Hayu, Sumbi…
DAYANGSUMBI
(Ngépéskeun leungeun Sangkuriang) Jug, hidep leumpang tiheula.
SANGKURIANG
Anjeun nu kudu tiheula, bisi aya nu ngaganggu anjeun.
Dayangsumbi jeung Sangkuriang patutur-tutur ninggalkeun éta patempatan. Lampu pareum.
Adegan III
Wanci beurang. Roni datang bari ngagukguk ceurik. Roni, hiji lalaki nu umurna antara 20-25 taun.
RONI
Harianeun pisan… téga pisan anjeun cidra. Naha anjeun mani téga? Naha anjeun bet hianat? Duh, tulungan uing! Cik atuh sing aya piwelasna, tulungan uing… tulungan uing….!
Jaka hanjat ti jero lobang bari gigisik. Roni langsung ngagabrug Jaka.
RONI
Tulungan uing, Mang… tulungan uing….
JAKA
Enya, jep heula atuh, ulah ceurik baé. Sok ayeuna mah geura caritakeun sing jéntré, aya pasualan naon atuh silaing téh?
RONI
Nyeriii, mang… nyeri pisan…
JAKA
Enya nyeri téh nyeri kumaha? Pok, geura caritakeun….
RONI
Pamajikan
uing salingkuh, Mang… nyeri pisan. Nasib téh kieu-kieu teuing. Padahal
kurang kumaha uing téh? Kurang kumaha, Mang? Saban poé uing digawé dug
hulu pet nyawa ukur ngabélaan pamajikan. Naha atuh asih dipulang sengit…
asih dipulang sengit…harianeun… kejem… téga…
JAKA
Geus,
ulah katutuluyan, Jang. Matak kitu gé, pamajikan silaing téh sigana
geus teu suka ka silaing. Lamun geus teu suka, nya ulah dipaksakeun.
Sabab, lamun anjeun maksa nu teu suka, tangtu baé salah kacida… Mending
bikeun wé ka salingkuhanna, tuluy du’akeun sing pinanggih jeung
kabagjaan.
RONI
Tapi
uing bogoh pisan, Mang…uing embung pipisahan jeung pamajikan. Uing
bogoh kabina-bina. Basa uing hayang kawin ka manéhna, puasa mutihna ogé
41 poé…
JAKA
Lamun bogoh kénéh, kari tuluykeun wé rumahtangga silaing, teu kudu loba nyarita….
RONI
Tapi… tapi… haté uing peurih kacida… nyeri pisan…
JAKA
Jadi, silaing téh hayang kumaha atuh?
RONI
Kapaksa… uing rék ngurebkeun ieu cinta ka pamajikan… taya deui jalan iwal ti dikurebkeun di Pajaratan Cinta….
JAKA
Éta mah kumaha silaing. Lamun silaing geus buleud patékadan rék ngurebkeun cinta, kari ngagebruskeun manéh ka Pajaratan Cinta…
Roni
ngaléngkah ka deukeut lobang. Ngajanteng sakedapan bari neuteup ka jero
lobang, tuluy mencrong ka jauhna. Kalayan asa-asa, Roni ngagebruskeun
karep ka jero lobang.
Teu lila, Agni ngaronghéap datang. Agni, hiji pajabat nu umurna kira-kira 40-45 taun.
AGNI
Sampurasuuun…!
JAKA
Rampés…
AGNI
Punten, rék tumanya… ari ieu téh nyaan Pajaratan Cinta téa?
JAKA
Leres pisan.
AGNI
Ari didinya kuncén Pajaratan Cinta?
JAKA
Sanés ari kuncén mah. Nanging… simkuring terang kana sasakalana ieu Pajaratan Cinta.
AGNI
Lamun
kitu mah, geus wé ti mimiti ayeuna, didinya diangkat jadi kuncén
Pajaratan Cinta. Urus sing bener ieu Pajaratan Cinta. Lamun aya nanaon,
kari ngomong ka didieu. Didinya tangtu nyaho saha ari didieu. Nyaho teu
saha ari didieu?
Jaka mencrong sakedapan.
JAKA
Duh….
Geuning ieu téh pangersa… hawatos teuing kersa rurumpaheun kadieu.
Tangtos baé atuh simkuring terang pisan ka salira. Salami ieu, simkuring
mung terang ka salira téh dina tivi wungkul. Manahoréng salira téh….
AGNI
Geus
teu kudu disebutkeun, bisi aya cakcak bodas. Pokona sing demit.
Rusiahkeun lamun didieu kungsi nganjang ka Pajaratan Cinta.
JAKA
Hapunten, cinta ka saha nu badé dikurebkeun ku salira téh? Cinta ka tuang garwa?
AGNI
Éta mah geus tangtu, lantaran kuring boga kabogoh deui ka ABG. Tapi aya nu leuwih penting ti éta…
JAKA
Hapunten… dupi maksadna kumaha?
AGNI
Sakeudeung
deui ogé didieu bakal jadi wawakilna nu ngawakilan wakil mentri. Engké
lamun geus jadi, didieu hayang jadi wakilna wakil mentri. Geus kitu,
naék kana wakil mentri, tuluy jadi mentri. Lamun geus jadi mentri,
didieu rék nyusun stratégi pikeun nyalon jadi Présidén. Kumaha wé
carana, ngarah rayat boga anggapan yén didieu téh dikaniaya ku présidén.
Rayat urang mah pan karunyaan lamun nyaksian anu dikaniaya téh. Pasti
didieu bakal dibaréla ku rayat, tur didukung jadi présidén.
JAKA
Saé, saé… saé pisan impénan téh…
AGNI
His,
lain impian atuh! Nu kitu mah ngaranna cita-cita. Bédakeun antara
impian jeung cita-cita. Ari impian mah hiji kahayang nu boa iraha
kahontalna, malah deukeut-deukeut kana moal kabiruyungan. Contona mah
lamun didieu hayang jadi pamaén Realmadrid, éta ngaranna ngimpi, da
puguh teu becus maénbal. Béda jeung cita-cita, anu pararuguh targét
waktuna, bari jeung ngukur kaayaan anu ayeuna keur disorang.
JAKA
Oh,
hapunten pami kitu mah. Lajeng, wangsul deui kana perkawis ngurebkeun
cinta téa… cinta ka saha anu badé dikurebkeun ku salira?
AGNI
Regepkeun,
Mang Kuncén, sakumaha anu kasaksian ku urang ayeuna, kahirupan téh asa
beuki ketir ngabandunganana. Loba rahayat nu katalangsara lantaran geus
teu walakaya nganghareupan kahirupan nu natrat beuki beuki beurat.
Pangangguran beuki nambahan, anu antukna angka kamiskinan réalitasna mah
jelas naék pisan. Ngabusung pisan lamun aya nu nyebutkeun angka
kamiskinan turun. Tuh, tingali nu baramaén di parapatan! Tuh, ténjo nu
haréés di kolong jambatan! Tuh, saksian nu ngantay pasesedek rék dibagi
dibagi duit ku jutawan! Tuh, deléh nu padumukanna digusur! Tuh, deuleu
pasar-pasar tradisional nu diduruk! Jalma leutik mah beuki kaséréd, tur
lila-lia tangtu bakal kaléléd. Matakna teu anéh lamun ngalantarankeun
beuki undakna kriminalitas jeung karusuhan. Nu silih paéhan alatan
perebut hakaneun. Nu silih podaran alatan parebut lahan usaha. (nginghak) Peurih haré didieu téh… nyeri pisan nyaksian kaayaan rahayat siga kitu.
JAKA
Sumuhun, mémang kitu kanyataanna…
AGNI
Heueuh, Mang Kuncén, tapi ari di sisi séjén mah kaayaanna papalimpang pisan. Para pajabat pamaréntah jeung wakil rayat, mancénna
baroyot jeung barolot. Beuteung wé galembrot ladang cocorokot. Aya ogé
nu ngan nguruskeun patlot. Lain patlot sabangsa péso pangot, da ieu mah
patlot anu sok ditambaan ku Ma Érot. Angot nu pipina karempot. Nyahona
ngan dikenyot jeung dilamot. Beuki parétot jeung paréot, mingkin kahot
cocorokot. Diarot. Regot, regot, ngaleueut késang rayat nu lamokot
boborot bobolokot. Siga nu heueuh tipopolotot sosorongot ngabéla rahayat
di nagri warisan kolot. Silih sorobot, silih kaprot. Nu puguh mah ukur
hayang kasorot, ngarah leuwih laluasa cocorokot. Brot! Brot! Brooot…! Brooot…! Torotot! Torotot! Héot…! Maranéhna babacot. Kalah bau badot.
JAKA
Sumuhun,
leres, leres, simkuring sapuk pisan. Teu sangki salira téh geuning
pajabat anu kritis. Langki pisan pajabat anu titén kana nasib rahayat
sapertos salira…
AGNI
Nu
matak didieu ogé ahirna jadi ngarumas. Naha batur mah mani taya
ras-rasan madog duit rahayat? Naha batur mah mani taya kainggis
ngabeungharkeun dirina jeung kulawarga? Béda, béda pisan jeung didieu nu
salawasna asak timbangan, tara kumawani korupsi saeutik-eutik acan.
Karunya, deudeuh, nyaah, jeung cinta ka rahayat. Didieu kalintang cinta
ka lemah cai, geusan wariskeuneun ka anak incu nu baris datang.
JAKA
Saé, saé pisan salira mah…
AGNI
Lain
saé-saé, Mang Kuncén! Didieu ogé sarua baé hayang beunghar, hayang
nyandung, hayang boga awéwé simpenan. Mangkaning kasempetan keur korupsi
mah kalintang lobana. Sakali korupsi gé didieu mah bisa kabeuli pulo,
bisa kabeuli mobil pangméwahna, bisa bobogohan jeung modél pangséksina…
JAKA
Punten, dupi maksadna kumaha?
AGNI
Heueuh,
pangna didieu datang kadieu téh apan tujuanna éta. Didieu hayang
ngurebkeun rasa cinta ka rahayat jeung lemah cai, ngarah laluasa korupsi
bari teu boga rasa karunya, nyingkirkeun rasa watir, nyingkahkeun rasa
welas ka sasama. Didieu hayang jadi jalma téga! Kajeun teuing batur mah
katalangsara ogé, nu penting mah didieu bisa sukan-sukan sapanjang
jaman….
JAKA
Janten… salira téh badé ngurebkeun rasa cinta ka rahayat sareng lemah cai?
AGNI
Enya, didieu geus buleud patékadan, mending kénéh dikurebkeun baé, ngarah teu loba pikiran dina ngagasak duit rahayat téh.
JAKA
Sumangga, salira kantun lebet kana lobang pajaratan cinta. Kurebkeun cinta salira di dinya….
AGNI
Hé hé hé… nuhun, Mang Kuncén. Ayeuna kénéh didieu rék asup ka Pajaratan Cinta…
JAKA
Pangapunten… raksukan salira kedah dilaanan heula. Cekap nganggo kolor baé.
AGNI
Har, na moal peundeul kitu?
JAKA
Teu kedah isin-isin sagala. Kapan engké ogé salira moal gaduh kaisin pami diparengkeun janten koruptor…
AGNI
Aéh,
enya bener. Naha maké jeung kudu éra sagala. Geus hiji tradisi jadi
koruptor mah. Bakal sohor, loba disorot kaméra tivi. Dibui paling
sababaraha taun, jaba dipotong rémisi. Kaluar ti bui kari nunjalan duit
ladang korupsi pikeun sukan-sukan méakeun umur…
Agni mukaan pakéanna, kari nyésakeun kolor jeung dasi.
AGNI
Mang
Kuncén, meunang lamun dasina teu dibuka? Sabab dasi ieu téh jimat
didieu, meunang marancahan 99 urang dukun, sangkan didieu tetep kapaké
ku rahayat. Saratna ieu dasi ulah leupas tina awak dina kaayaan kumaha
baé ogé. Lamun dasi ieu dibuka, bakal ragrag jabatan didieu téh…
JAKA
Mangga, kénging…
Agni ngaléngkah ka deukeut lobang. Teu asa-asa, ngagajleng ka jero lobang. Roni ngagoak. Agni ogé ngagoak. Agni hanjat deui.
AGNI
Bedul
siah….! Geuning aya mangkeluk di jero lobang?! Leuheung lamun awéwé
mah, didieu ogé atoh. Apan itu mah sarua jalu! Naha moal nanaon
paduduaan jeung anu jenis kelaminna sarua? Kumaha lamun mangkeluk itu gay? Cilaka tah didieu digadabah ku gay…
Roni hanjat ti jero lobang.
RONI
Sangeunahna pisan siah nuduh gay ka uing… (reuwas barang ningali rupa Agni) aéh… hapunten… manawi téh sanés pangersa. Hapunten pisan….
AGNI
Matakna saméméh engap téh, deléh heula saha nu keur disanghareupan, kéhéd!
RONI
Hapunten,
Pangersa… hapunten pisan… mangga bilih pangersa bade lebet ka Pajaratan
Cinta mahi, da abdi parantos réngsé. (Ka Jaka) Hatur nuhun pisan Mang,
ayeuna mah geus ilang rasa cinta ka pamajikan nu rucah téh. Ayeuna geus
buleud patékadan, rék pipisahan baé. Pilakadar urusan awéwé, asa teu
kudu leuleuweungan sagala. Nyeri haté ku awéwé, ubarna kari awéwé deui.
Naon héséna sih?
JAKA
Sukur wé ari silaing geus cageur mah….
RONI
Geus walagri deui ayeuna mah. (Ka Agni) Mangga, pangersa, abdi badé permios tipayun…
AGNI
Kélanan, kumaha karasana sanggeus rereb di Pajaratan Cinta téh?
RONI
Mujarab pisan, Pangersa. Cinta abdi langsung ilang… Mangga cobian ku pangersa…
Roni ninggalkeun éta patempatan.
AGNI
Enyaan, lamun kitu carana mah matih pisan geuning Pajaratan Cinta…
Agni ngaléngkah ka lebah lobang. Saméméh ngagajleng noongan heula ka jero lobang.
JAKA
Teu aya sasaha ayeuna mah…
AGNI
Nyaan?
JAKA
Leres… mangga geura lungsur…
Agni ngagajleng ka jero lobang. Tapi teu lila ngagoak, bari tuluy hanjat deui.
AGNI
Gélo téh… geuning loba bangkong korodok!
JAKA
Teu
sawios-wios atuh pilakadar bangkong korodok. Kapan salira ogé moal aya
béntenna sareng bangkong korodok saupamina tos henteu cinta ka rahayat
mah…
AGNI
Aéh, enya bener…
Agni ngagajleng deui ka jero lobang. Teu lila, Agni seuri ngagakgak di jero lobang.
AGNI
Ha ha ha…ngeunah geuning daging bangkong korodok ogé…. Dihakan ku aing mah kabéhanana!
Jaka ngarasa murel nepi ka hayang utah. Teu lila, Agni hanjat ti jero lobang.
AGNI
Gampil pisan geuning ngurebkeun cinta ka rahayat mah. Babari pisan, ha ha ha…! Bener-bener matih Pajaratan Cinta téh! Ayeuna
ogé geus langsung ilang rasa cinta. Isukan moal asa-asa ngagasak duit
rahayat, ha ha ha…. Kuring bakal jadi jalma jegud, bru di juru, bro di
panto, ngalayah di tengah imah… ha ha ha… bru anu munu’u, bro anu
marontok, ngalayah nu nangkarak bengkang… ha ha ha…
Agni mulungan bajuna, tuluy ninggalkeun éta patempatan.
Sakedapan Jaka ngahuleng siga nu linglung. Rét ka luhur, rét ka handap, teu puguh cabak. Tuluy ngaléngkah ka deukeut lobang.
JAKA
(ngagorowok harus) Aaaaggh….! Ariiiin….! (ngahariring sempalan lagu “Matahariku”, Agnes Monica) …dengarlah
matahariku suara tangisanku, ku bersedih karna panah cinta menusuk
jantungku, ucapkan matahariku puisi tentang hidupku, tentangku yang tak
mampu menaklukan waktu…
Jaka ngagebruskeun manéh ka jero lobang.
Sapasang
lalaki jeung wanoja asup bari silih kaléng, ngaléngkah ka deukeut
lobang. Duanana asup ka jero lobang. Teu lila duanana kaluar deui bari
silih baeudan. Tuluy ninggalkeun éta patempatan kalayan leumpangna
ngalér-ngidul.
Asup
saurang lalaki bari sura-seuri sorangan. Tuluy asup ka jero lobang. Teu
lila kaluar deui, bari ceurik ngagukguk, tur ninggalkeun éta
patempatan..
Asup
saurang wanoja bari nginghak ceurik. Tuluy asup ka jero lobang. Teu
lila, kaluar deui bari nyéréngéh seuri sorangan, sarta ninggakeun éta
patempatan.
Lampu pareum.
Adegan IV
Wanci Peuting. Arin nu salin jinis jadi Pohaci Rababu ngaronghéap.
RABABU
(Ngahariring pupuh Asmarandana)
Nu nanceb dipusti-pusti
Aya sirung teu kembangan
Lantaran poho ngalongok
Katumbiri méré béja
Rék datang sandékala
Sandékala bakal ngejat
Jaka hanjat ti jero lobang
JAKA
(ngahariring Pupuh Kinanti)
RABABU
Léngkah leutik nyacag jukut,
haté rangkidut. Ibun ka ibunan, sumirat hamo némbongan. Halabhab
wahangan, nganti hujan salaksa duriat. Cipruk cimata di lelemah
wirangrong, nu ngahuyungkung tisolédat na walahar. Anjeun budra-bidru
ngaléngkah, tuluy anjeun tikoséwad dina amlongan.
JAKA
Naon
éta téh hartina, Nyai Rababu? Naha anjeun ukur datang di antara impian
jeung kanyataan? Cacak anjeun bisa némbongan salawasna, meureun kuring
téh moal kasiksa dina kasimpé.
RABABU
Geuna-geuna anjeun melak tangkal suliga. karunya ka nu kapidangdung. Anjeun kudu bisa ngararaba rasa sasama.
JAKA
Naha
ukur kuring wungkul nu kudu ngaraba rasa? Ari batur teu kudu ngaraba
rasa kuring? Ari batur teu kudu ngarasakeun kumaha peurihna haté kuring?
RABABU
Lambaran
carita éndah kahirupan anu minuhan léngkah jeung engapan anjeun. Anu
narétésan gurilapna harepan anjeun. Hiji-hiji bakal haliberan, nungtutan
ngagarupayan, mileuleuyankeun haté anjeun anu gudawang.
JAKA
Naha teu meunang kuring manggih kabagjaan? Naha ulah?
RABABU
Lain
teu meunang, lain ulah. Dina mangsa ayeuna, anjeun kalintang dipahing
micinta Arin. Keun, isuk jaganing géto sugan jeung sugan pareng
ngarépok. Nu utama, dina mangsa ayeuna, anjeun ulah! Anjeun teu meunang,
dina mangsa ayeuna.
JAKA
Nyai Rababu, lamun anjeun nyaram kuring ngahiji jeung Arin, naha anjeun daék jadi gagantina?
RABABU
(imut) Kula jeung Arin mémang taya bédana. Tapi kula ukur aya di antara impian jeung kanyataan.
Rababu diuk.
JAKA
Anjeun ngabohong, Nyai Rababu. Anjeun pasti aya di kieuna.
Jaka ngadeukeutan Pohaci Rababu, tuluy ngagolédag dina lahunan Pohaci Rababu.
Lampu pareum.
Adegan V
Wanci beurang. Jaka saré dina batu.
Noni asup, semu langlayeuseun. Noni, hiji wanoja nu umurna antara 20-25 taun.
NONI
Punteeen… punteeen…
Jaka ngoréjat. Tuluy rarat-rérét ka sakuriling.
JAKA
Nyai Rababu! Dimana anjeun?
NONI
Pangapunten abdi ngaganggu, Gan…
JAKA
Saha anjeun? Aya naon datang kadieu?
NONI
Abdi
mah ukur jalmi nu tos peunggas harepan. Tadina mah abdi badé
ngagéléngkeun manéh dina rél karéta… namung nguping wartos didieu aya
tempat nu namina Pajaratan Cinta…
JAKA
Enya, bener. Didieu pisan Pajaratan Cinta nu ditéangan ku anjeun. Ari anjeun rék ngurebkeun cinta?
NONI
Sanés,
Gan… justru abdi mah badé ngalap cinta. Rumaos tos teu gaduh cinta dina
ieu diri, anu antukna tos wegah mayunan kahirupan. Mamanawian didieu
abdi tiasa ngalap cinta tina cinta-cinta anu parantos dikurebkeun….
JAKA
Didieu tempat ngubur cinta, lain tempat ngalap cinta…
NONI
Sumuhun,
abdi ogé yaktos perkawis éta mah. Nanging… ieu mah hoyong nyobian wé
jarah ka Pajaratan Cinta, mamanawian tiasa ngalap cinta….
JAKA
Nya
ari rék maksa mah kumaha anjeun. Kuring ukur mépélingan wungkul, bisi
cinta anjeun korédas jeung haté-haténa. Tuh, asup wé ka jero lobang!
Noni ngaléngkah ka lebah lobang, tuluy ngagebruskeun manéh ka jero lobang.
Jaka mencrongkeun dibarung kabingung.
Teu lila, Noni hanjat deui kalayan paroman béar marahmay.
NONI
Akang… ari abdi kunaon, akang? Ahéng pisan geuning ieu mah…
JAKA
Ahéng kumaha maksudna?
NONI
Naha abdi bet ujug-ujug cinta ka akang. Hayu urang nikah sareng abdi, akang! Abdi cinta pisan ka akang…
Noni lumpat muru ka lebah Jaka. Puguh baé Jaka reuwas. Jaka lumpat ninggalkeun éta patempatan, sarta diudag ku Noni.
Agni ngaronghéap datang.
AGNI
Mang Kuncééén…! Suksés euy! Mang Kuncén…! Dimana manéh, Mang Kuncén???
Noni norojol.
NONI
Aduh alah ieung… mani kasép sareng gagah akang téh… abdi cinta ka akang…
AGNI
Aéh, aéh… saha ari manéh? Kakara wawuh ujug-ujug bogoh. Boa-boa manéh mabok cinta….
NONI
Duka atuh, akang… pokona abdi cinta ka akang…
AGNI
Manéh mah over dosis cinta…
NONI
Akang, hayu urang nikah sareng abdi…! Akang ulah lumpat….!
Agni lumpat ninggalkeun éta patempatan, kalayan diudag ku Noni.
Lampu pareum.
Adegan VI
Wanci peuting. Arin ngaronghéap. Tuluy rurut-rérét néangan Jaka.
ARIN
Jaka… Jaka… Jakaaa…!
Jaka kaluar ti panyumputan.
JAKA
Arin!
Jaka jeung Arin silih rangkul. Arin nginghak ceurik.
JAKA
Naha anjeun kadieu deui? Kapan cinta anjeun geus dikurebkeun di Pajaratan Cinta….
ARIN
Mémang geus dikurebkeun, Jaka. Tapi cinta téh teu weléh marakayangan saban mangsa.
JAKA
Lamun kitu mah taya bédana. Cinta kuring ogé kalah ngajungjurigan…
ARIN
Cinta teu weléh ngariwanan…
JAKA
Cinta kalah ngaririwaan…
ARIN
Kudu kumaha atuh, Jaka?
JAKA
Lamun kalah marakayangan, ngajungjurigan, ngariwanan, ngaririwaan… kapaksa kudu disampurnakeun.
ARIN
Kumaha cara nyampurnakeunna, Jaka?
JAKA
Kieu,
sigana mah anu dikurebkeunna lain cinta wungkul, tapi sakalian wé
dikurebkeun jeung awakna. Sok, ayeuna mah geura ruang kuring di
Pajaratan Cinta!
ARIN
Lamun awak anjeun dikubur ku kuring, saha nu bakal ngaruang kuring? Jadi, mending kénéh awak kuring anu diruang ku anjeun.
JAKA
Ari engké anu ngubur kuring saha?
Jaka jeung Arin ngabetem. Ronghéap Suhadi datang.
SUHADI
Maranéh duaan henteu kudu diruang. Mending kénéh kubur awak kuring ku maranéh…
Arin jeung Jaka ngaranjug. Arin muru ka Suhadi, tuluy nyuuh dina nampal suku Suhadi.
ARIN
Kang Suhadi… hapunten abdi, Kang… hapunten…
SUHADI
Lamun anjeun teu bogoh ka kuring, naha atuh anjeun bet daék dikawin ku kuring?
ARIN
Hapunten abdi… Kang….
Suhadi
ngaléngkah ka lebah Jaka, tuluy mencrong Jaka seukeut naker. Leungeunna
tipepereket nahan amarah, lir anu sajebrod-jebrodeun nonjok Jaka.
SUHADI
Anjeun rék ngarebut pamajikan kuring?
JAKA
Enya,
tapi kuring mah kakara arék. Béda jeung anjeun. Anjeun mah geus
kabuktian ngarebut kabogoh kuring. Ti 10 taun katukang, kuring geus
paheut jangji pikeun ngambah rumah tangga jeung Arin. Tapi anjeun
ngancurkeun impian kuring. Anjeun nu ngaburak-barik harepan kuring…
anjeun nu ngaburantakeun rarancang éndah kuring…
SUHADI
Kuring
teu nyaho jeung teu hayang kana lalakon pamajikan. Sakabéh manusa
miboga mangsa lawas séwang-séwangan. Tapi dina mangsa paheut jatukrami,
hartina sakabéh lalakon mangsa katukang kudu dikubur. Kuring geus lima
taun rarabi, sarta geus boga turunan. Anjeun ngaganggu rumahtangga
kuring! Anjeun biadab!
JAKA
Ayeuna
sanggeus anjeun nyaho lalakon cinta kuring jeung Arin, naha anjeun
keukeuh rék maksakeun kahayang? Bisi anjeun teu nyaho, cinta mah moal
bisa dipaksakeun. Arin ukur micinta kuring, lain micinta anjeun!
Suhadi ngahuleng.
SUHADI
Enya, hampura kuring… ana kitu mah, kuring nu kudu ngéléhan…
Suhadi ngagebruskeun manéh ka jero lobang. Arin ngaranjug, tuluy muru ka lebah lobang.
SUHADI
Sok,
geura kubur awak kuring ku maranéh duaan! Kuring nu salah. Kuring nu
ngarebut kabagjaan maranéh! Lamun kuring geus dikubur, maranéh bisa
laluasa ngumbar kasuka….
ARIN
Kang Suhadiii! Ulah, Kang…!
Arin metot leungeun Suhadi
SUHADI
Keun baé, kuring ihlas… demi kabagjaan aranjeun…
ARIN
Ulah, Kang… hampura abdi… Kumaha teuing nasib Rizky , anak urang…. Sing karunya ka anak urang, Kang….
Suhadi hanjat deui. Tuluy Suhadi ngarangkul Arin.
SUHADI
Hayu urang mulang….
ARIN
Mangga, Kang…
Suhadi nuyun leungeun Arin, ngaléngkah ninggalkeun éta patempatan.
JAKA
Suhadi…!
Suhadi jeung Arin ngarandeg. Jaka nyampeurkeun.
JAKA
Hampura kuring… Kuring ngadu;akeun kabagjaan aranjeun…
Suhadi neuteup Jaka. Tuluy Suhadi ngarangkul Jaka.
SUHADI
Urang silih lubarkeun, Jaka… urang silih hampura…
Sanggeus Suhadi ngaleupaskeun rangkulan jaka. Arin ngaléngkah ka lebah Jaka.
ARIN
Jaka, hampura kuring… (bari ngasongkeun leungeun, ngajak sasalaman)
Jaka ngabalieur, henteu daék nampanan leungeun Arin.
JAKA
Moal aya nu bisa ngaganti anjeun, sanajan diganti ku anjeun….
Suhadi nuyun deui pigeulang leungeun Arin, sarta ninggalkeun éta patempatan.
Jaka ngaléngkah ka lebah lobang. Tuluy ngagebruskeun karep ka jero lobang.
Noni Norojol.
NONI
Akaaang… akaaang…. Abdi cinta ka akang…
Noni lunga-lengo ka jero lobang. Jaka hanjat bari nyepeng suluh.
JAKA
Indit siah! Mun teu indit, disiksa ku aing!
NONI
Akang… naon lepat abdi… ampuun, akang…. Abdi cinta ka akang…
JAKA
Sakali deui ngomong cinta, ku aing disiksa!
Noni lumpat bari nginghak.
Torojol Agni.
AGNI
Suksés
pisan, Mang Kuncén. Ayeuna didieu geus jadi koruptor kelas kakap.
Didieu geus jadi jalma medah-meduh, sagala aya, sagala boga, sagala
nyampak. Tah, ayeuna téh loba babaturan didieu anu sarua hayang
ngurebkeun cinta, ngarah bisa korupsi bari teu kahalangan ku rasa
karunya. Engké didinya kudu ngabagéakeun sakur babaturan didieu anu rék
ngurebkeun cinta. Keun, gampil perkara honorna mah. Bisi didinya hayang
hapé nu panganyarna, ku didieu dipangmeulikeun. Pokona mah engké didinya
bisa maén facebook atawa twitter. Engké lamun didinya geus bisa
facebookan, wayahna kudu diajar poker. Gampil modal chip mah, engké ku
didieu dibéré…. Ha ha ha… aya ku nikmat geuning jadi jalma jegud téh…
hanjakal teu tibaheula….
JAKA
Indit siah!
AGNI
Kumaha? Teu salah déngé ieu téh?
JAKA
Nyingkah ayeuna kénéh! Lamun henteu, disiksa ku aing!
AGNI
Aéh, aéh… kakara dibéré jabatan kuncén, didinya geus wani cucungah ka didieu!
JAKA
Sakali deui, nyingkah siah!
AGNI
Kurang ajar pisan geuning didinya téh! Na geus poho saha ari didieu?
JAKA
Paduli teuing saha manéh, nu penting lamun manéh teu nyingkah ti dieu, ku aing disiksa!
Jaka ngababukeun suluh, dibubat-babét. Agni soak, tuluy lumpat ninggalkeun éta patempatan.
Jaka ngasruk ka sisi lobang. Tuluy ngagukguk.
Arin nu salin jinis jadi Pohaci Rababu, ngaronghéap datang.
RABABU
Jaka… Jaka…
Jaka teu ngalieuk, kalah ngagukguk beuki harus.
RABABU
Jaka, ieu kula, Arin…
JAKA
Moal aya nu bisa ngaganti Arin, sanajan digantian ku Arin…
RABABU
Deudeuh teuing, Jaka… cinta anjeun teu anu geus dikurebkeun téh angger marakayangan, teu bisa disampurnakeun…
JAKA
Cinta kuring geus dikurebkeun… geus tilar dunya…
RABABU
Lamun
anjeun masih kénéh micinta, anjeun ulah nyarita geus henteu cinta.
Lamun anjeun teu bisa mopohokeun, anjeun ulah nyarita geus poho. Ku cara
kitu pisan jiwa anjeun kasiksa. Di Pajaratan Cinta anjeun ngurebkeun
cinta. Tapi dina hiji mangsa, lamun kaayaanna teu papalimpang jeung
kahayang alam, anjeun bisa ngagali deui éta cinta.
Jaka cengkat, tuluy nyuuh bari ngagukguk dina dampal suku Pohaci Rababu.
JAKA
Nyai Rababu, ulah ninggalkeun deui kuring…
RABABU
Wayahna,
Jaka… anjeun kudu iklas. Anjeun kudu jadi lalaki sajati nu mibanda
cinta sajati. Anjeun ngarti anu anu disebut cinta sajati?
Jaka gideug
RABABU
Cinta
sajati nyaéta ikhlas ngantepkeun wanoja anu dipikacinta ku anjeun
pinanggih jeung kabagjaan, sanajan lain jeung anjeun. Malah anjeun kudu
ngadu’akeun sangkan manéhna bagja salawasna, sanajan lain jeung anjeun….
Anjeun
kudu nyaho, lamun anjeun iklas kaleungitan wanoja nu kalintang
dipikacinta, éta téh mangrupa pangorbanan cinta anu hakiki… pangorbanan
cinta anu hakiki…pangorbanan cinta nu hakiki….
Pohaci Rababu ngaléngkah, ninggalkeun Jaka.
Jaka melongkeun Pohaci Rababu. Sanggeus Rababu leungit, Jaka ngagebruskeun manéh ka jero lobang. Lampu pareum.
Réngsé
Sumber : http://galuh-purba.com/pajaratan-cinta-naskah-festival-drama-basa-sunda-2012